golda rate today : सोने आणि चांदीने या वर्षी ऐतिहासिक उच्चांक गाठल्यानंतर आता जोरदार घसरण सुरू झाली आहे. गेल्या काही दिवसांत, विशेषतः गेल्या १२ तासांत, आंतरराष्ट्रीय बाजारात प्रचंड विक्रीचा सपाटा लागला असून गुंतवणूकदारांना मोठे नुकसान सहन करावे लागले आहे.
१९ नोव्हेंबर २०२६ रोजी १८ कॅरेट सोन्याचा दर अनेक शहरांमध्ये एक लाख रुपयांच्या खाली आला आहे. तर २२ आणि २४ कॅरेट अजूनही तुलनेने महागच आहे. आंतरराष्ट्रीय बाजारात सोन्याचा भाव २.६९ टक्क्यांनी घसरून सप्टेंबर २०२५ नंतरच्या नीचांकी पातळीवर पोहोचला आहे. चांदीचा भाव तर ४.७० टक्क्यांनी कोसळला असून ऑक्टोबर २०२५ नंतरचा सर्वात कमी स्तर गाठला आहे.
या घसरणीमुळे सोन्याच्या जागतिक बाजारमूल्यात सुमारे ७२९ अब्ज डॉलर म्हणजेच जवळपास ६५ लाख कोटी रुपयांची घट झाली. चांदीमध्येही सुमारे १२८ अब्ज डॉलर (११.४ लाख कोटी रुपये) इतकी बाजारातून राख झाली.
घसरणीमागची मुख्य कारणे
अमेरिकेतील मजबूत डॉलर, महागाईची भीती आणि फेडरल रिझर्व्हकडून व्याजदर वाढण्याची शक्यता यामुळे सोन्या-चांदीवर दबाव आला आहे. आंतरराष्ट्रीय बाजारात सोने डॉलरमध्ये ट्रेड होते. डॉलर मजबूत झाल्यास इतर देशांसाठी सोने महाग होते आणि मागणी कमी होते. कच्च्या तेलाच्या उच्च किमतींनीही महागाईची चिंता वाढवली आहे. बँक ऑफ अमेरिका आणि इतर संस्थांच्या अहवालांमध्ये हीच कारणे अधोरेखित केली आहेत.
चांदीने जानेवारी २०२६ मध्ये १२१ डॉलर प्रति औंसचा ऐतिहासिक उच्चांक गाठला होता. आता त्यात जवळपास ६१ टक्के घसरण झाली असून भाव १९८० च्या जुन्या उच्चांकापेक्षाही खाली गेले आहेत.
२०२७ चे अंदाज काय सांगतात?
बँक ऑफ अमेरिकेच्या अंदाजानुसार, जागतिक आर्थिक दबाव कमी झाल्यास २०२७ मध्ये चांदीचा भाव ७५ डॉलर प्रति औंसपर्यंत पोहोचू शकतो. जागतिक बँकेच्या अहवालानुसार २०२६ मध्ये चांदीचा पुरवठा मागणीपेक्षा जास्त (सुमारे ९१० टन अतिरिक्त) राहू शकतो. मात्र २०२७ मध्ये पुरवठा ८५२ टनाने कमी पडण्याची शक्यता आहे, ज्यामुळे मागणी वाढून किमतींना आधार मिळू शकतो.
काही तज्ज्ञ दीर्घकाळात सोन्या-चांदीबाबत सकारात्मक राहिले आहेत. मात्र अल्पकालीन दबाव कायम राहण्याची शक्यता आहे. लग्नसराई आणि सणासुदीच्या काळात घसरलेले दर ग्राहकांसाठी दिलासादायक ठरत आहेत.

ग्राहकांसाठी संधी की सावधानता?
सध्याचे दर १८ कॅरेट सोन्यासाठी आकर्षक वाटू शकतात. मात्र पुढील दिशेबाबत अनिश्चितता आहे. गुंतवणूकदारांनी बाजारातील अस्थिरता लक्षात घेऊन सावधगिरी बाळगावी. दागिने खरेदी करणाऱ्यांसाठी ही घसरण फायदेशीर ठरू शकते, पण दीर्घकालीन गुंतवणुकीसाठी बाजारातील ट्रेंड आणि जागतिक आर्थिक घडामोडींवर लक्ष ठेवणे आवश्यक आहे.








