Kapas Kranti Yojana : महाराष्ट्रातील कापूस उत्पादक शेतकऱ्यांसाठी आनंदाची बातमी आहे. केंद्र शासनाच्या कापूस उत्पादकता अभियान (कपास क्रांती) अंतर्गत कापूस श्रेडर खरेदीसाठी मोठे अनुदान जाहीर करण्यात आले आहे. सन २०२६-२७ या वर्षात राज्यातील १९ जिल्ह्यांमध्ये ही योजना राबविण्यात येत आहे.
कापूस पिकाची काढणी झाल्यानंतर उरलेल्या अवशेषांचे (स्टॉक) व्यवस्थापन करणे शेतकऱ्यांसाठी मोठे आव्हान असते. यासाठी कापूस श्रेडर यंत्र खूप उपयुक्त ठरते. हे यंत्र अवशेषांचे लहान तुकडे करून जमिनीत मिसळण्यास मदत करते, ज्यामुळे जमिनीची सुपीकता वाढते आणि पुढील पिकासाठी जमीन तयार होते. आता हे यंत्र खरेदी करताना शासनाकडून अनुदान मिळणार असल्याने शेतकऱ्यांवरील आर्थिक भार कमी होणार आहे.
कोणत्या जिल्ह्यांमध्ये योजना लागू आहे?
कापूस उत्पादकता अभियान (कपास क्रांती) खालील १९ जिल्ह्यांमध्ये राबविण्यात येत आहे:
अहिल्यानगर, धुळे, जळगाव, नंदूरबार, छत्रपती संभाजीनगर, जालना, बीड, नांदेड, परभणी, हिंगोली, अमरावती, यवतमाळ, वाशिम, बुलढाणा, अकोला, वर्धा, नागपूर, चंद्रपूर आणि गडचिरोली.
किती अनुदान मिळणार?
कापूस श्रेडर खरेदीसाठी अनुदान खालीलप्रमाणे आहे:
- अनुसूचित जाती (SC) व अनुसूचित जमाती (ST) प्रवर्गातील शेतकऱ्यांना: यंत्राच्या किमतीच्या ५० टक्के, कमाल ₹७५,०००
- सर्वसाधारण प्रवर्गातील शेतकऱ्यांना: यंत्राच्या किमतीच्या ४० टक्के, कमाल ₹६०,०००
कोण अर्ज करू शकतो?
या योजनेचा लाभ खालील घटकांना मिळू शकतो:
- वैयक्तिक शेतकरी
- शेतकरी गट
- शेतकरी उत्पादक कंपनी (FPO)
- कृषी क्षेत्रात कार्यरत सहकारी संस्था
अर्ज कसा करायचा?
अर्ज महाडीबीटी (MahaDBT) पोर्टलवर ऑनलाइन करावे लागतील. लाभार्थी निवड प्रथम येणाऱ्यास प्रथम प्राधान्य (First Come First Served) या तत्त्वावर केली जाणार आहे. त्यामुळे लवकर अर्ज करणे फायद्याचे ठरेल.
अर्ज करण्याची साइट: mahadbt.maharashtra.gov.in
अर्ज करताना शेतकऱ्यांकडे फार्मर आयडी (AgriStack), आधार कार्ड, बँक खाते तपशील आणि संबंधित जमिनीचे कागदपत्रे तयार असावेत.
शेतकऱ्यांसाठी महत्त्वाची सूचना
कृषी आयुक्तालयाकडून या १९ जिल्ह्यांतील जास्तीत जास्त शेतकऱ्यांनी या योजनेचा लाभ घ्यावा, असे आवाहन करण्यात आले आहे. अधिक माहितीसाठी आपल्या जिल्ह्यातील जिल्हा अधिक्षक कृषी अधिकारी, उपविभागीय कृषी अधिकारी किंवा तालुका कृषी अधिकारी कार्यालयाशी संपर्क साधावा.
