मुख्यमंत्री वारकरी महामंडळ स्थापन

     आषाढी वारी म्हटलं की सर्वांना पंढरपूर येथील विठ्ठल  रखुमाई ची आठवण येते. दरवर्षीप्रमाणे या वारीमध्ये अनेक छोट्या-मोठ्या ग्रामीण भागातून या वारीमध्ये जाण्यासाठी वारकरी सहभागी असतात. दरवर्षीप्रमाणे या वारीमध्ये 15 ते 20 लक्ष वारकरी या वारीमध्ये सहभागी असतात. वेगवेगळ्या गावातून वेगवेगळ्या कुटुंबातील वारकरी हे एक महिना माऊली माऊली करत पायी चालत असतात. ही अशीच परंपरा शेकडो वर्षापासून चालत आलेली आहे यात लाखो लोक धर्मकार्य व समाजकार्य भक्ती मार्गाने करीत असतात. महाराष्ट्रातील थोर समाजसेवक विभूती आणि संत महंत यांचा फार मोठा हातभार आहे. याची उदाहरण म्हणजे शेकडो वर्ष पासून सुरू असलेली पंढरपूरच्या विठोबा रायाची वारी. वारी संप्रदायाचा पाया चरणाचे श्रेय संत ज्ञानेश्वरांना दिले जाते तसेच संत ज्ञानेश्वर, संत निवृत्तीनाथ, संत सोपानदेव, संत बहिणाबाई, संत तुकाराम, संत एकनाथ, संत मुक्ताबाई हे वारकरी संप्रदायातील महत्त्वाचे संत होते. यांचे महत्त्वाचे वैशिष्ट्य म्हणजे वारी, जी आज पण या महाराष्ट्रामध्ये पंढरपूरकडे लाखो वारकरी आषाढी एकादशीला या वारीचा आनंद घेत असतात. ज्यामध्ये अनेक जाती-धर्माचे भाविक लाखोच्या संख्येने सहभागी होतात. ही परंपरा साधारणता 800 वर्षाहून अधिक कालावधीपासून असल्याचे मानले जाते. अशा या वारकऱ्यांकरिता मा. मुख्यमंत्री, महोदयांनी   वारकरी सांप्रदाया करिता स्वातंत्र्य महामंडळ स्थापना करण्याबाबतची घोषणा केली आहे.

    आषाढी वारी म्हणलं की  विविध गावांपासून पंढरपूर पर्यंत केलेली पदयात्रा होय. या वारीमध्ये लाखो वारकरी पंढरपूर येथे जमतात, परंतु  पंथांची दीक्षा न घेतल्याने अनेक विठ्ठल भक्त ही येतात. आंध्र – कर्नाटकातून येणाऱ्यांची संख्या मोठी असते. तसेच वारीही आषाढी आणि कार्तिकी महिन्यातील शुद्ध एकादशी अशा दोन वेळी होते. या वारीमध्ये त्रिंबकेश्वर येथून संत निवृत्तीनाथांची, शेगाव येथून संत गजानन महाराज यांची वारी दर वर्षी निघत असते. तसेच यामध्ये पुढील संतांच्या पालख्या महाराष्ट्रातून वेगवेगळ्या ठिकाणा वरून मार्गस्थ होत असतात. संत तुकाराम महाराज (देहू), संत एकनाथ महाराज (पैठण), संत सोपान काका (सासवड), संत मुक्ताबाई (मुक्ताईनगर), संत नामदेव (पंढरपूर), संत नरहरी सोनार (पंढरपूर), संत जनार्दन स्वामी (छत्रपती संभाजी नगर), संत जयरामस्वामी (वडगाव), संत घाडगेबोवा(कोळी), संत तपकिरीबोवा (चिंचगाव), संत मच्छिंद्रनाथ(मच्छिंद्रगड), संत रोहिदास(पंढरपूर), संत जनाबाई(पंढरपूर), संत चोखोबा(पंढरपूर), संत चोखोबा बंका (मेहूनापुरा ), संत दामाजी (मंगळवेढे), संत रखुमाबाई, संत शंकर महाराज (माऊली अमरावती), संत गोरखनाथ (शिराळ) या सर्व दिंड्यांबरोबर लाखो भावी पंढरपूरच्या मार्गावर असतात.

    महाराष्ट्रातील गावागावातून लाखो भावीक  दरवर्षी वारीला जातात. यामध्ये प्रामुख्याने काम करी, शेतकरी, कष्टकरी यांचा समावेश असतो. परंतु वर्षांन – वर्ष वारकऱ्याची आणि दिंड्यांची संख्या वाढल्याने वारीच्या व्यवस्थापनांचे सूक्ष्म निवेदन महत्त्वाचे ठरले आहे याकरिता वारी महामंडळ उपयुक्त ठरू शकेल या सर्वाचा विचार करून मा. मंत्रिमंडळाच्या बैठकीत दिनांक 11 जुलै 2024 रोजी वारकरी महामंडळ स्थापना करण्याबाबतचा निर्णय घेण्यात आलेला आहे.